Poslovne vesti - Makedonija

Отворени првите фабрики во индустриската зона кај Валандово

Два производни текстилни капацитети, кои отворија 300 нови работни места и од вчера почнаа официјално со работа, се првите инвестиции во индустриската зона Раброво кај Валандово, во која e предвидено да бидат отворени 50-ина фабрики.

Инвестицијата во вредност од 2,5 милиона евра е на македонската компанија „Дока текстил“ и на групацијата ДМИСС.

Почетокот на работата на овие две фабрики го означија вицепремиерот и министер за финансии Зоран Ставрески и градоначалникот на Општина Валандово, Николче Чурлиновски, заедно со инвеститорите.

Според министерот за финансии, оваа инвестиција е значајна по тоа што се реализира во време на криза во Европа и кога тешко може да се најде пример на отворање нови производни капацитети.

- Владата и понатаму ќе ги дава најдобрите услови во Европа, најниските даноци, ниска цена за земјиштето и поддршка на локалната власт, а со цел да се реализираат инвестиции и да се отвораат нови работни места - рече вицепремиерот Ставрески.

Сопственикот на „Дока текстил“, Тони Пандев, потенцира дека двата нови производни капацитети ќе обезбедат работа за 1.000 луѓе во текстилните фабрики во општина Валандово.

- Двете фабрики ќе се занимаваат со производство на текстилни производи кои се 100-процентно наменети за пазарите на ЕУ. Во нив ќе се произведуваат на годишно ниво околу 5.000.000 парчиња. Стратегиски партнер е Грција, а производите што се пласираат на пазарите на ЕУ работат за познати брендови, како Strees One од Германија, Verhouse и Assos од Англија - рече Пандев.

Во индустриската зона Раброво во наредниот период ќе бидат отворени уште осум објекти, меѓу кои и капацитети за производство на сончеви колектори, пакувана вода, изолациски панели, урбана опрема, фабрика за конзервирање зеленчук и слично.

Само во инвестиции за објекти во зоната ќе влезат 15 милиони евра.